أحمد حجاجوفيتش
"الصين بلد عظيم" دي مقولة صحيحة مليار في ال١٠٠ ، و من كتر ما الصين بقت عظيمة في كل حاجة، إبتدي عشرات الملايين من السياح من جميع أنحاء العالم يزوروها سنوياً و أي واحد بيزور الصين بيرجع يزورها مرات تانية كتير ، و قريب جداً حتبقي أكبر بلد سياحي في العالم و ده لأنها ليها سحر عجيب بيذهل العقول و العيون
حجاجوفيتش حيقولكم ١٠ أسباب تخلي كل المصريين يسافروا الصين و يستمتعوا بأجمل و أسعد و أرخص أجازة صيفية هناك :
١- فيزا الصين سهلة جداً و سفارة الصين في القاهرة بتشجع كل المصريين إنهم يسافرولها
٢- مصر للطيران عاملة خط مباشر من القاهرة لمدينة جوانزو الصينية و عاملة عرض خاص في الصيف بمناسبة إن الخط بقي يومي، فالتذكرة (ذهاب و عودة) بتبدأ من ٣٠٠٠ جنيه و ده يعتبر أرخص سعر تذكرة في جميع شركات الطيران
٣- سعر الفنادق و بيوت الشباب في الصين رخيصة جداً، يعني ممكن الواحد يقعد إسبوع هناك بسعر يومين في أوروبا
٤- الأكل و الشرب في الصين رخيص و متنوع و موجود في كل مكان وممكن الواحد يقضيها طبق نودلز صيني طبيعي ب٤ جنيه و لو مع صحابك تتغدوا طبق جمبري صيني ال٦٠ جمبرياية ب٥٠ جنيه ... ده غير إن إزازة المية ب ١،٥ جنيه
٥- المواصلات العامة (المترو و الأوتوبيسات ، إلخ) و التاكسي في الصين من أرخص المواصلات العامة و التكاسي في العالم وموجودة بأعداد خيالية و شغالة علي أعلي مستوي و خدمتها ٥ نجوم و كلها مكيفة
٦- رغم الحجم الهائل للصين في المساحة، إلا إن السفر من مدينة لمدينة تانية في الصين من أسهل و أسرع ما يمكن لأن عندهم القطار الرصاصة اللي بيمشي بسرعة حوالي ٤٠٠ كم/ساعة و شبكة القطارات الرصاصة موصلة كل المدن الصينية بطريقة رائعة
٧- الحكومة الصينية مهتمة بالأمن بطريقة غير مسبوقة و عندها حرية و سلامة و أمان و مساعدة السياح دي أهم حاجة ، فمفيش أي سائح بيحس بأي خطر علي نفسه أو علي حاجته و هو في الصين و ممكن تنزل في أي وقت تتمشي في أي مكان حتي لو الفجر من غير ما تشيل أي هم
٨- الصين تعتبر قارة مش دولة لكبرها الرهيب و فيها كل حاجة ممكن الواحد يتخيلها و حاجات لا يمكن تخطر علي خيال حد و مهما الواحد سافر هناك كذا مرة حيلاقي إنه عايز يروح كمان و كمان عشان يكتشف و يزور حاجات و أماكن و مدن أكتر
٩- أي حد بيعرف "الفصال" و أعتقد إن المصريين أساتذته، حيعرف يجيب أي حاجة من الصين ( من الإبرة للصاروخ) بجودة عالية جداً و بأرخص سعر في العالم، لأن أي حاجة صيني الواحد بيجيبها هنا في مصر بتبقي جودة رديئة و سعرها أغلي ٥-٦ مرات علي الأقل من سعرها في الصين "و ده عشان جشع التجار المصريين"
١٠- الشعب الصيني شعب ودود و طيب جداً وبيعشقوا مصر و المصريين و بيتغيروا تماماً و بيتبسطوا أوي لما يعرفوا إن الواحد مصري و الأطفال بتلاقيهم بيتلموا علي الواحد عشان يتصوروا معاه
أهم حاجة إنك قبل ما تسافر لازم تتعمل الكلمات دي بالصينية لأنها حتفرق معاك كتيييير أوي هناك ( آي جي = مصر) ، (نيهاو = أهلاً) ، (شيشي = شكراً)
0 comments:
Post a Comment