جرب ..مش يمكن يطلع أحسن ؟!

مشهد (1)

نادين: محمود، ممكن تديني 2000 جنيه عشان في تخفيضات نازلة .. وعايزة اعمل شوبينج

محمود: 2000ج !! ليه؟ ....مش لسة مديكي زيهم الشهر اللي فات عشان السيل برده!

نادين : بس ده ياحبيبي سيل جديد.. يرضيك منزلش اروح اشوف إيه اللي منزلينه

محمود: لأ ..إزاي.. ميرضينيش طبعا .. دي تيجي ..هتنزلي أكيد

نادين: بجد ياحبيبي

محمود: أيوة طبعا بس بشرط... هتعملي LIKE

بس ممنوع الـSHARE

نادين: L

مشهد (2)

برنس: مش هتيجي معايا ماتش بكرة في الإستاد

باشا: يابرنس احنا مش لسة رايحين ماتش من يومين

برنس: أيوة ياباشا بس الماتش ده هيبقى جامد جدا

باشا: ما أنت يا اسطى كل ماتش بتقول عليه جامد جداً وراشق فيه

برنس: ما أنت عارف يا بني الكورة دي كل حياتي

باشا: طيب امشي من هنا بقى ..وعلى رأي سعد زغلول "مفيش فايدة "

مشهد (3)

نورا: يابنتي ما تقومي بقى من على النت ده واعملي حاجة مفيدة ..اقعدي معانا .. ساعدي ماما .. روحي زوري تيتة ..أعملي حاجة تنفعك

منى: يوووووه كل شوية تقوليلي الكلمتين دول ..طهقت

نورا : ما انتي بقيتي أوفر ... نايمة ،صاحية، أكلة، شاربة نت نت نت

منى: استني استني... شوفتي مارك منزل أبليكشن جديد بس إيه مقولكيش خرافة.

نورا: شوف بقولها إيه .. وهي في إيه .. والله لأقول لماما تفصل الراوتر.

منى: L

في كل المشاهد اللي فوق .. شوفنا أمثلة كتيرة من ناس عايشة وسطينا مهوسيين بحاجة معينة شغفهم بالحاجة دي وصل حد الإدمان

اللي أدْمَن الشوبينج.. ولا النت ..ولا الماتشات ..وغيرها .

حصروا نفسهم في دائرة ضيقة جدا .. ومش عارفين يخرجوا منها بسبب شغفهم بحاجات عمت أبصارهم عن غيرها .

بقت الحاجات دي شاغلة كل تفكيرهم ..وده مخليهم للأسف واقفين محلك سر، يوم زي عشرة زي سنة ، مفيش أي جديد في حياتهم

أنا مش ضد إنك تشغل نفسك بشئ معين مباح ، لكن ضد الولع بهذا الشئ.

خليك معتدل في كل تصرفات حياتك.. جرب تخرج بره الدائرة اللي حصرت نفسك فيها

جرب تفتَح عينك وتشوف حاجات تانية تشغل وقتك بيها ، مش يمكن تحس إن يومك فيه أنشطة متنوعة وتقدر تقتل الروتين اليومي الرتيب ، وتحس إن وقتك منظم وفيه بركة.

- جرب تلعب رياضة

- شارك في عمل تطوعي

- اقرأ كتاب

- زور أقاربك

- اتعلم حاجة في دينك

- احفظ آية من قرآنك

- اتعلمي أكلة جديدة

- ارسمي رسمة جميلة

شوف يومك بشكل جديد .. جدد حياتك .. عيش شبابك .

جرب ..مش يمكن يطلع أحسن ؟!